LAOAG CITY – Inpakaammo ni Vice Mayor Jonathan De Lara nga adda ti dua a barangay iti ili ti Solsona ti isolated gapu iti Super Typhoon Nando.
Segun kenkuana, daytoy ket kalpasan nga alisto a ngimmato ti lebel ti danum iti karayan ken kalsada iti Barangay Nalasin ken Barangay Lipay iti nasao nga ili.
Gapu iti daytoy, kunana a napupok ken saanen a makaruar pay dagiti maseknan a residente kadagiti pagtaenganda.
Inbatadna a basar iti kaudian a datos nga iggemna, adda ti 10 a pamilia a bukbuklen ti 28 nga indibidual ti agdama a nagibakwit iti evacuation center no sadinno a 2 a pamilia iti Barangay Bagbago, 2 a pamilia iti Barangay Juan, 5 a pamilia iti Barangay Talugtog ken 1 a pamilia iti Barangay Laureta.
Inlawlawagna a saan pay laeng a makadalyasat dagiti lugan iti paset ti national highway ti Barangay Santiago gapu ta saan pay a naiwaknit dagiti nakaabbeng a natulid a kayo gapu iti kinapigsa ti angin.
Inpasingkedna a maituloy ti pannakaiwayat ti clearing operations inton bigat tapno maipasigurado nga accessible met laeng dagiti kalsada no bilang adda ti emerhensia a mapasamak.
Innayonna a naiget ti pannakikoordinarna iti Municipal Disaster Risk Reduction and Management Office iti mapaspasaran a situasion dagiti umili kabayatan iti iduduprak ti Super Typhoon Nando.
Maipalagip a ti nasao a dua a barangay iti ili ti Solsona ket isu manen dagiti barangay a na-isolate gapu kadagiti naglabas a bagyo.
