LAOAG CITY – Agamak ni Vice President Sara Duterte iti “welfare check” a maipagarop nga inyuswat ti Philippine Embassy iti The Hague iti ama na a ni dati President Rodrigo Duterte, kabayatan nga adda iti pagbaludan.
Segun kenni Duterte, nakaawat ti inawagan na a “disturbing information” manipud iti Malacañang nga adda ti report nga insubmitir ti embassy kenni President Ferdinand “Bongbong” Marcos Jr. mainaig iti ama na.
Inbatad na a simrek dagiti opisyal iti detention unit a nagpammarang a mangiyuswat ti ‘welfare check’ ken ininterview da ti dati a Presidente.
Kunana nga inabuso dagiti opisyal ti paglintegan ti detention unit mainaig iti consular visits.
Inlawlawag na nga inpalubos ti International Criminal Court dagiti agents a makastrek iti pasilidad a saan da man laeng nga innala ti pammalubos ti pamilya na nga ada mismo iti The Hague.
Inbatad na a sipud naipan ti ama na iti The Haue idi Marso ita a tawen ket adda latta ti maysa wenno dua a miembro ti pamilya na a bumisbisita iti kada aldaw.
Gapo iti daytoy, kunana a saan a kasapulan ti ama na a bisitaen ti Philippine government gapo ta ti pamilya na ti mangasikaso kenkuana.
Maipalagip a ni dati a Presidente Duterte ket natiliw idi Marso 11 babaen iti warrant of arrest nga inisyu ti International Criminal Court (ICC).
