LAOAG CITY – Nangipatungpal ti Indian security forces ti curfew iti Leh, ti kabisera ti Himalayan region ti Ladakh, kalpasan nga adda ti uppat nga indibidual a pimmusay iti napasamak nga engkwentro iti nagbaetan dagiti pulis ken protesters a mangipetpetteng ti statehood para iti federal territory.
Malaksid kadagiti natay ket dinosdosena pay a sabsabali dagiti nasugatan ken napuuran ti opisina ti Bharatiya Janata Party (BJP) ti India.
Binabalaw ti gobierno ni activist Sonam Wangchuk, a nangidaulo ti tignay-protesta a nagtungpal iti kinadamsak, banag a naglikudan ti maseknan.
Maipalagip a ti mountainous desert a pagnanaeddan ti Muslim-Buddhist, ti Ladkah ket napukaw na ti semi-autonomy idi 2019 kalpasan a biningay ti Bharatiya Janata Party manipod iti dati nga Indian-administered state ti Jammu ken Kashmir a nangipatungpalan ti agpada a pagannurutan.
Ti Leh region a nakaparnuayan ti kinadamsak ket adda iti nagbabaetan ti India, China ken Pakistan nga idadaulwan ti Buddhist community a mangkidkiddaw ti pannakaisina ti rehiyon para kadagiti tattao na.
Kabayatanna, kalikagom met ti distrito ti Kargil a kaadoan ti Muslim ti maitipon iti Kashmir nga iturturayan ti India.
