LAOAG CITY – Naipan iti babaen ti “State of Calamity” ti Ilocos Norte gapu iti kaadu dagiti nadadael iti iduduprak ti “super typhoon Nando” ditoy probinsia.
Daytoy ket kalpasan a nagkaykaysa dagiti kameng ti Sang. Panlalawigan a nangaprobar kabayatan ti regular session dagitoy iti resolusyon a nakaisagudayan daytoy a banag a sinertipikaran ni Governor Cecilia Araneta Marcos nga “urgent”.
Immun-una ngem iti daytoy, inpakaammo ni Mr. Marcell Tabije, Provincial Disaster Risk Reduction Management Officer ti Provincial Government of Ilocos Norte nga immabot iti nasursurok ngem P2.1 a bilyon a pisos ti dagup dagiti naipadanon iti opisina da a nadadael.
Malaksid iti daytoy, inlawlawagna nga immabot iti uppat a gasut uppat a pulo ket tallo (443) a barangay dagiti naapektaran manipud iti 559 a barangay ditoy probinsia.
Impalgakna a basar iti kaudian a naireport iti opisinada ket umaboten iti sangapulo ket uppat a ribu lima gasut (14,500) dagiti naapektaran a pamilia, tallo ribu siyam a gasut ken lima dagiti nadadael ti sumagmamano a pasetna a balay ken innem a pulo ket siyam a balay dagiti nadadael a naminpinsan.
Segun ken ni Tabije, daytoy ti rason a naikiddaw ti pannakaideklarar ti “state of calamity” tapno mausar ti “quick response fund” ti Provincial Government of Ilocos Norte.
Innayonna nga agpapan kadagitoy nupay nakadakdakkelen ti dagup dagiti naipadanon iti opisinada a nadadael ket adda pay laeng dagiti sumagmamano a Local Government Units a saan pay a nakaipadanon kadagiti nadadael iti bukudda a lugar.
Kabayatanna, inpakaammona a basar iti istatistika, umab-abot iti duapulo a bagyo ti sumsumrek iti pagilian iti tinawen ken iti agdama ket addan ti siyam a nakastrek iti pagilian.
