LAOAG CITY – Kinumpirmaran ni Independent Commission for Infrastructure (ICI) Executive Director Atty. Brian Hosaka a paayaban ti Independent Commission for Infrastructure da dati nga Speaker Martin Romualdez, resigned Cong. Zaldy Co ken dati a Department of Public Works and Highways (DPWH) Sec. ken itan Sen. Mark Villar.
Inbatad ni Hosaka a naipatuloden ti subpoena kada Romualdez ken Co.
Naikeddeng met a maimbitaran ti komision ni dati a Department of Public Works and Highways Sec. ken itan Sen. Villar.
Inadmitir ni Hosaka a saan pay a karaman ni Romualdez iti inrekomendar ti Independent Commission for Infrastructure iti Anti-Money Laundering Council (AMLC) tapno ma-freeze dagiti sanikua.
Naammoan nga inton sumaruno a lawas ket mamindua a daras laengen ti agbalin nga hearing ti Komision ken daytoy ket iti kada Martes ken Mierkoles.
Karaman iti maminsan manen a sumango iti Independent Commission for Infrastructure inton sumaruno a lawas ket ti agasawa a Discaya ken ni dati a Department of Public Works and Highways Usec. Roberto Bernardo.
