LAOAG CITY – Naglikudan ni Senador Mark Villar dagiti alegasyon mainaig iti koneksyon na iti kontratista a na-awardan kadagiti proyekto idiay Las Piñas.
Basar iti impormasyon, maipagarop a kasinsin wenno “first cousin” ni Senador Villar ti kontratista a nakaala kadagiti proyekto para iti bukod da a ciudad.
Mapatta-patta nga umabot iti nasurok nga P18.5 billion dagiti maipagarop a naala nga infrastructure projects ti kontratista a maikonkonektar iti senador
Inlawlawag ti senador nga awan ti direkta wenno pagderderetsoan na nga agtagikua wenno akin-kontrol iti aniaman a kompanya a karaman kadagiti proyekto ti Department of Public Works and Highways (DPWH).
Inpetteng na a mismo nga official record na ti mangkumpirmar nga awan uray maysa kadagiti kabagyan na ti nakaala ti kontrata manipod 2016 agingga iti 2021 idi daytoy ti nakatugaw kas sekretaryo ti Department of Public Works and Highways.
Segun ken ni Villar, ti kangrunaan a gagem na idi ket maipatungpal ti naun-uneg ken nalawlawa a reporma, ken mapapigsa ti panagtalek ti publiko iti Department of Public Works and Highways.
Inkari met ti senador a saanna a tallikudan ti aniaman nga imbestigasyon gapu ta awan ti ilemlemmeng na nga aniaman a banag.
Innayon na a suportado na ti imbestigasyon ti Independent Commission for Infrastructure (ICI).
