LAOAG CITY – Nagsinnapgud ti dua a nakamotorsiklo iti Barangay 20, San Pablo iti ili ti San Nicolas.
Iti inisyal nga imbestigasion, agpada a nakalugan ti NMAX ti dua a driver no sadinno a kabayatan a dumaldalyasat ti maysa kadagitoy nga agpa-abagatan nga aglikko ket ditoy a simmapgud ti maysa pay a nakamotorsiklo nga agpa-amianan.
Gapu iti daytoy, nagsagaba ti sugat iti nagduduma a paset ti dua a driver ken insigida a naitaray dagitoy iti kaasitgan nga ospital babaen kadagiti nagresponde a kameng ti Bureau of Fire Protection ken Philippine National Police.
Naammoan nga agpada met a nakasuot ti protective helmet dagiti dua a driver ken awan ti kinalubbonda idi napasamak ti desgrasia.
Iti agdama, agtultuloy ti maiwaywayat nga imbestigasion dagiti otoridad mainaig iti napasamak.
