LAOAG CITY – Nagatendar ni Gov. Cecilia Araneta Marcos iti nasantoan a misa para iti fiesta ni St. Michael the Archangel ken pangrikep iti “tercentennial year” ti Santa Monica Parish iti ili ti Sarrat.
Inwanwan a mismo ni Bishop Renato Mayugba ti naisayangkat a misa kalpasan a saan a nakaumay ni Archbishop Emiritus ti Cotabato Orlando B. Cardinal Quebedo gapu ta masakit.
Kalpasan ti misa, naipaayan ti gundaway ti gobernador a nangipaay ti mensahena kadagiti umili.
Inpadanonna ti pammatina a ti kaadu dagiti nagatendar ti misa ti mangipamatmat iti kaadda ni Jesus Christ iti panagbiag ti tunggal maysa.
Kunana a rumbeng laeng a marambakan ti tumibtibker a pammati ken ni Jesus Christ kalpasan ti tallo gasuten a tawen a pannakaipasdek ti simbaan.
Innayonna a kas iti ina ti probinsia ket namnamaenna a ti panangrambak iti “tercentennial year” ti simbaan ket marambakan met ti rumayrayray a pammati ti tunggal maysa.
Kalpasan ti misa, naiyawat ken ni Gov. Marcos ti “standarte” a naituding a maiyawat ken ni Cong. Ferdinand Alexander “Sandro” Marcos III kas Hermano mayor ita a tawen.
