LAOAG CITY – Naglikudan ni Barangay Chairman Richard Marquez iti Barangay Mandaluque iti ili ti Dingras ti alegasyon nga imbes nga iti barangay hall ket iti paggasolinaan na ti pagderderetsoan dagiti opisyal ti barangay tapno isu ti pagbantayan wenno pagduty-an da.
Inlawlawag ti kapitan nga adda ti pammilin ti mayor kadakuada a tumulong da nga agbantay ken mangsita kadagiti ubbing wenno menor de edad nga agmanmaneho ken dagiti nariringgor ti motorsiklo na.
Gapu iti daytoy, nagdesisyon da nga iti laengen covered court ti barangay ti pagyanan da tapno al-alisto a makita ken mainspeksyon da no menor de edad dagiti agmanmaneho ti motorsiklo, ken masita da a dagus dagiti nariringgor ti motorsiklo na.
Kuna na nga adda pay ti inkabil da a barikada iti lugar tapno aginayad dagiti motorista kangrunaan na dagiti nakamotorsiklo tapno mainspeksyon ken makita da no menor de edad dagiti agmanmaneho.
Inpakaammo ni Marquez a ti covered court da ket kaabay laeng iti paggasolinaan ken water refilling station da.
Mainaig iti daytoy, inbatad ti kapitan a adda dagiti nadutukan nga agduty iti kada aldaw iti covered court a maysa a barangay kagawad ken dua a barangay tanud idinto nga iti barangay hall da ket isu ti kanayun a pagtaltalinaedan ti barangay secretary ken treasurer.
Innayon na a rinugyan da ti nagyan iti covered court idi Hunyo ita a tawen.
Kabayatanna, inpakaammo ti kapitan nga ado latta dagiti menor de edad nga agmanmaneho ti motorsiklo iti ili da ken adda payen ti pimmusay gapu iti napasamak a disgrasya.
