LAOAG CITY – Nagkiddaw ti nayon a panawen iti Independent Commission for Infrastructure (ICI) ti agasawa a Pacifico “Curlee” Discaya ken Sarah Discaya tapno maisubmitir dagiti dokumento a dawdawaten ti komision mainaig iti imbestigasion kadagiti maanomalya a flood control projects.
Inbatad ni Independent Commission for Infrastructure Executive Director ken Spokesperson Atty. Brian Keith Hosaka, naikeddeng inton Oktubre 15 ti sumaruno a panagdengngeg tapno maipasa ti agasawa ti nayon a dokumento.
Kabayatanna, inlawlawag ni Hosaka nga iti nagbalin a panagdengngeg ni Senador Mark Villar, inpakita ti agpanpanday linteg dagiti nagbalin a proseso iti Department of Public Works and Highways (DPWH) idi isuna pay laeng ti sekretario iti daytoy.
Kunana a kalpasan iti daytoy ket saanton a mapaayaban ni Villar iti komision.
Naglikudan ni Hosaka dagiti alegasion ti maipagarup a “cover-up” iti imbestigasion ti Independent Commission for Infrastructure.
Inpettengna a pagsungbatenda ti asinoman a mapaneknekan a karaman kadagiti iregularidad iti flood control projects.
