LAOAG CITY – Nangiruar ita nga aldaw ti imbitasion ti Independent Commission for Infrastructure (ICI) tapno sumango ni dati nga House Speaker Martin Romualdez iti komision tapno ilawlawag ti napasamak iti budget insertions ken Department of Public Works and Highways (DPWH) flood control projects iti panawen ti panagserbina.
Ni dati met a Rep. Zaldy Co ket pina-subpoena ti komision tapno agatendar mainaig iti ammona kas dati a Chairman ti House Committee on Appropriations.
Inbatad ni Independent Commission for Infrastructure Spokesperson Brian Keith Hosaka, no bilang saanda nga agatendar, posible nga agpatulongen iti korte tapno ipa-contempt dagiti indibidual gapu ta iti agdama ket awan ti bilegda para iti daytoy.
Naammoan nga inton Oktubre 14, 2025 a naikeddeng a sumango ti dua nga indibidual.
Kabayatanna, inpasigurado ti komision nga agtultuloy daytoy iti panangiwayat ti imbestigasion mainaig kadagiti iregularidad kadagiti flood control project ti gobierno iti baet nga awan ti bilegna nga i-cite in contempt kadagiti indibidual a maim-imbestigaran.
Kuna ni Hosaka, iti baet a mangirekrekomendar laeng ti bileg ti komision, aktibo latta nga im-imbestigaran dagiti posible a karaman iti korapsion.
Innayonna a gagem ti Independent Commission for Infrastructure a magun-od ti kinapudno ken saan a mausar ti proseso para iti pulitikal nga interes no sadinno nga imbes a livestream, mangiruar lattan dagiti ladawan manipud iti uneg ti panagdengngeg ti komision kas paset ti transparency.
