LAOAG CITY – Maragsakan ti Malacañang iti panagbaba ti bilang dagiti indibidual nga awanan ti trabaho idi August 2025 ken agtultuloy ti Marcos administration ti panangipay na iti publiko ti job opportunities.
Segun kenni Palace Press Officer Undersecretary Claire Castro, saan nga agsarsardeng ti gobierno ken ti presidente tapno rumang-ay ti panagbiag iti kada Pilipino.
Kunana a karaman ditoyen dagiti job fairs a maiyus-uswat tapno maiyasideg kadagiti tattao ti trabaho ken itultuloy daytoy ti gobierno.
Inbatad na pay a napintas a damag daytoy ngem saan a ditoy nga aglippas gapo ta ado pay ti kalikagom ti presidente para kadagiti tattao kangrunaan na iti pagbiagan da.
Ummuna iti daytoy, inreport ni Philippine Statistics Authority chief ken National Statistician Claire Dennis Mapa a ti unemployed persons nga agtawen ti 15 agpangato ket bimmaba iti 2.03 million manipud iti 2.59 million iti July 2025.
Nababbaba daytoy ngem iti 2.07 million jobless individuals idi August 2024.
Kabayatanna, ti labor force participation ket ngimmato manipud 48.64 million idi July 2025 ken 51.22 million idi August 2024.
