LAOAG CITY – Nagturong ti Department of Trade and Industry iti probinsia ti Nueva Ecija para iti bench marking activity iti bamboo products.
Segun ken Provincial Director Amelia Galvez iti Department of Trade and Industry, maysa daytoy nga addang ti nasao a departamento tapno maamoan pay dagiti dadduma a practices ti sabali a lugar a mabalin nga adaptaren ti probinsia.
Daytoy ket para iti ad-adda pay a pannakapapintas ti bamboo industry ditoy probinsia.
Kuna ni Galvez a napateg a maamoan dagiti local entrepreneurs ti dadduma pay a bamboo-based product tapno adda ti nayon a produkto da.
Inbatad na a naipangruna pay ti tulong a maipapaay ti shared service facility kas suporta iti bamboo production nga ad-adda pay a makaited pagbiagan kadagiti negosyante.
Mangnamnama ni Galvez a ti panagsursursor ti grupo da kadagiti dadduma a lugar ket makaited ti adal wenno ideya kadagiti local entrepreneurs tapno mapalawa met ti bamboo industry ditoy probinsia.
