LAOAG CITY – Umaboten ti 75 ti kumpirmado a bilang dagiti pimmusay iti idadayyeg ti magnitude 6.9 a gingined idiay Bogo City, Cebu idi Setyembre 30.
Segun ken ni Office of the Civil Defense (OCD) deputy administrator Assistant Sec. Bernardo Alejandro IV, agtultuloy ti panagkalap ti ahensiya kadagiti imporasyon no adda ti natay iti idadayyeg ti magnitude 6.0 nga aftershock iti oras ti ala-1:06 itay parbangon.
Adda metten ti 600 nga indibidual dagiti nairekord a nasugatan iti insidente.
Iti agdama, basar iti OCD official, umaboten iti nasurok a 11,000 nga aftershocks ti nairekord manipod iti magnitude 6.9 a gingined iti Bogo City.
Basar iti kaudian a datos ti NDRRMC, nasurok a 3,500 nga indibidwal wenno nasuroka a 800 a pamilya dagiti nagtalinaed kadagiti evacuation centers idinto a dagiti dadduma ket temporaryo a napan nakipagnaed iti sabali a lugar.
Agdama paylaeng a naikabil iti babaen ti state of calamity iti intero a probinsya ti Cebu.
