LAOAG CITY – Nakasublin idiay Israel ti 20 a nabatbati a sibibiag nga hostages ti Hamas iti Gaza.
Naminsan manen a nakadua dagiti nasao nga hostage ti bukudda a pamilia kalpasan ti sumurok dua a tawen a pannaka-hostage dagitoy.
Nupay kasta, saan pay a winaya-wayaan ti Hamas ti 28 a natay nga hostages.
Na-kidnap dagiti hostages babaen ti panangatake ti Hamas idi Oktubre 7, 2023.
Mainaig iti daytoy, kas panagsinnukat kadagiti hostages, winaya-wayaan ti Israel ti 250 a balud a Palestino ken sumurok 1,700 a balud no sadinno ti umuna a grupo ket nangrugin a simmangpeten iti Ramallah iti naukuparan a West Bank ken Gaza.
Naammoan a nagturong idiay Israel ni United States President Donald Trump para iti panagbitlana ti parliament ken mapan idiay Egypt para met iti peace summit kaduana dagiti dadduma pay a world leaders.
Immuna iti daytoy, indeklarar ni Trump a nagngudon ti gubat idiay Gaza ngem nagkedked daytoy a sungbatan dagiti dadduma a saludsod kas no ania dagiti sumaruno nga addangna para iti peace plan daytoy.
