LAOAG CITY – Naitaray ni dismissed Bulacan first district engineer Henry Alcantara iti ospital idiay Pasay City idi lunes, Oktubre 13 gapu iti “chest discomfort”.
Daytoy ti kinumpirmaran ni Senate Sergeant-at-Arms Mao Aplasca.
Segun ken ni Aplasca, naipadalan ni Alcantara ti electrocardiogram (ECG) ken dadduma pay a confirmatory tests iti Pasay Medical Center tapno maamoan no ania ti problema iti salun-at na.
Kuna na a basar iti resulta dagiti nagdalanan a test ni Alcantara ket muscle spasm ti sinagaba na.
Innayon na a kalpasan ti pannakacheckup ni Alcantara ket naisubli metlaeng iti senado.
Ni Alcantara ket maysa kadagiti opisyal ti Department of Public Works and Highways (DPWH) a maipagarop nga adda ti pakainaigan na iti flood control controversy.
Maipalagip nga idi Setyembre 18 ket na-contempt gapu iti panagswitik ken panangipetpetteng na nga awan ti ammo na iti ghost flood control projects iti Bulacan.
Immuna iti daytoy, inbatad ni Senate President Vicente “Tito” Sotto III a kiniddaw da Alcantara, kadwa na da dati a Bulacan first district engineers a Brice Hernandez ken Jaypee Mendoza iti senado a maipadalan da iti house arrest, ngem agpapan ita ket awan pay ti desisyon ti .Senate blue ribbon committee iti nasao a banag.
