LAOAG CITY – Inpasigurdo ni House Committee on Appropriations, chairperson Rep. Mikaela Suansing a ti unprogrammed appropriations (UA) iti proposed P6.793-trilyon a nailyan a pondo ket saan a mausar para kadagiti flood control projects.
Segun kenni Suansing, awanen ti mabalin a flood control projects, kalsada, wenno rangtay a mausar manipud iti Strengthen Assistance for Social Programs (SASP).
Ti SASP nga addaan ti alokasyon a P45 bilyon ket paset iti 11 a gagem ti unprogrammed appropriations a nakailanad iti 2026 General Appropriations Bill (GAB) ken daytoy ket nestablisar tapno suportaran dagiti programa ti gobyerno.
Inlawlawag ni Suansing a ti unprogrammed appropriations nga agbalor ti P243.2 bilyon ti nagbalin a kangrunaan a rason no apay a 12 kongresista ti kimmonra iti maikatlo a pannakaibasa ti 2026 General Appropriations Bill idi Oktubre 13 ngem daytoy ket naaprubaran babaen iti 287 a pabor.
Inbatad ni Suansing a ti unprogrammed appropriations ket dagiti “stand-by appropriations” nga aprubado ti Kongreso iti General Appropriations Act ngem saan pay nga aktibo a pondo ken ti aktwal a panagusar ket depende iti savings ti gobyerno wenno pautang.
Naglikudan pay ni Suansing ti report a ti unprogrammed appropriations ket lump sum funds gapo ta adda ti nakailanad a nakalinya a programa ken gagem iti daytoy.
Innayon ni Suansing a ti unprogrammed appropriations para iti 2026 General Appropriations Bill ket nabababa ngem iti P120.2 bilyon no ikumpara iti unprogrammed appropriations ti 2025 General Appropriations Bill wenno budget.
