LAOAG CITY – Addan iti submitted for resolution ti kaso dagiti mapukpukaw a mammallot ita a nalpasen ti pakpakauna nga imbestigasion iti Department of Justice (DOJ).
Inbatad ni Department of Justice Spokesperson Atty. Polo Martinez, duktalenen ti panel of prosecutors no adda ti umdas nga ebidensia tapno ipila iti korte ti reklamo wenno maibasura daytoy.
Kabayatanna, inbatad ni Martinez a nakaala daytoyen ti sumurok 900 a tultulang iti Taal Lake no sadinno a mapapati a naibelleng dagiti mapukpukaw a mammallot.
Iti baet kadagiti maiwaywayat a panangbatok, inbatad ti Justice Department nga awan pay ti nagtugma kadagiti naala a tulang iti Taal manipud kadagiti DNA ti sumurok 30 a kabagian nga inalaan ti samples.
Nupay kasta, inlawlawag ni Martinez, dumur-as latta ti kaso uray awan ti nagtugma kadagiti DNA a naala.
Naisayangkat ti preliminary investigation iti Department of Justice no sadinno a 57 laeng manipud iti 62 a respondents ti nangisubmitir ti kontra salaysayda.
Immunan a nangipila ti counter affidavit iti napalabas a lawas ni Charlie “Atong” Ang a maitudtudo a mastermind iti panagpukaw dagiti mammallot ken ti aktres a ni Gretchen Barretto.
