LAOAG CITY – Marigatan dagiti doktor idiay Gaza a mangimbestigar iti senyales ti torture kadagiti saan pay a nabigbig a bangkay nga insubli ti Israel.
Sumangsango ti dakkel a pannubok ti forensics team iti Gaza’s Nasser hospital gapu ta awan ti DNA testing facilities wenno cold storage units nga usarenda.
Iti napalabas a 11 nga aldaw, 195 a bangkay ti naisublin iti Gaza babaen kadagiti otoridad ti Israel kas panagsinnukat kadagiti bangkay ti 11 nga Israeli hostages iti babaen ti Donald Trump’s ceasefire deal no sadinno karaman ditoy dagiti bangkay ti Tanzanian ken Thai hostages.
Nangiruar dagiti ladawan ti Gaza’s medical authorities a mangipakpakita kadagiti bangkay nga agruprupsan ken simmangpet a naka-sibilian a bado wenno nakasuot laeng ti underwear.
Naammoan a kaaduan kadagitoy ket naigalut dagiti imada, sumagmamano met kadakuada ket simmangpet a naka-blindfolded wenno natiritir ti bado iti tengngedda.
Kabayatanna, inbatad ni Dr. Ahmed Dheir, mangidadaulo iti nasao nga unit, maysa kadagiti sangsangoenda a problema ket ti kinakurang ti cold storage rason a marigatanda unay iti pannakaipadalan kadagiti bangkay iti post-mortem wenno autopsy.
