LAOAG CITY – Agpada a natay ti agina kalpasan a napaltu-paltogan iti paset ti Sitio Nagbukel iti Barangay San Antonio iti ili ti Piddig.
Nabigbig dagiti biktima nga isuda Maria Theresa Dansalan, agtawen ti 55 ken ti anakna a ni Jasper Dansalan, agtawen ti 27, pharmacist ken residente dagitoy iti Barangay Nalasin iti ili ti Solsona idinto a ti suspek ket nabigbig a ni Rodel Donato, agtawen ti 37, addaan ti live-in-partner, security guard ken residente iti Barangay Poblacion, Lapaz, Abra.
Segun ken ni P/Maj. Kristian Lee Badua, Hepe ti Piddig Municipal Police Station, kabayatan a dumaldalyasat ti kurong-kurong nga inturong ni Rick Garcia, agtawen ti 52, naasawaan, mannalon ken residente iti Barangay Nalasin iti ili ti Solsona kaduana dagiti agina pakairamanan ti dua pay a menor de edad ket pinasardeng isuda ti suspek agingga a kellaat a pinaltu-paltoganna dagiti biktima iti sumagmamano a daras iti nagduduma a paset ti bagida a nangitunda ti pannakatayda.
Inbatadna a basar iti inwayatda nga imbestigasion, dati nga ag-live-in partner ti suspek ken ti anak a babai ni Mrs. Maria Theresa iti uneg ti siam a tawen ngem nagsina dagitoy idi Hunio ita a tawen.
Nupay kasta, inlawlawagna a saan a maawat ti suspek nga adda ti baro a boyfriend ti dati a ka-live-in partner-na nga ad-adda a nasinged daytoy kadagiti agina.
Naarestar ti suspek a nakalugan ti motorsiklo kabayatan ti panagpatrolya dagiti pulis iti asideg ti lugar a nakapasamakan ti krimen.
Nakumpiskar ti paltog a calibre 45 kalpasan nga awan ti naipakita nga aniaman a dokumento ti suspek kadagiti otoridad.
Narekobre dagiti otoridad ti lima a cartridge cases ti calibre 45 ken maysa nga slug ti calibre 45 pakairamanan ti maysa nga unit ti calibre 45 a pistol nga addaan ti maysa a bala ken maysa a magazine.
Mainaig iti daytoy, inpakaammo ni P/Maj. Badua nga addan ti immun-unan a naawat a pangta iti biag dagiti agina manipud iti suspek.
Naammoan a mapan koma agatendar ti agina iti maysa a family dinner.
Kabayatanna, nagtalinaed iti pagbaludan ti suspek ken napilaan iti kaso a 2 counts of murder ken panaglabsing iti Republic Act No. 10591 wenno ti Illegal Possession of Firearms.
