LAOAG CITY – Naarestaren ti dua a suspek iti panagtakaw kadagiti alahas iti Louvre museum idiay Paris.
Basar iti Paris prosecutor’s office, natiliw ti maysa kadagiti suspek kabayatan ti panagsagsaganana iti flight manipud iti Charles de Gaulle Airport nga agturong idiay Algeria idinto a ti maysa ket agturong met idiay Mali.
Agbalor dagiti natakaw iti 102 a milyon a dolyar manipud iti maibilang a world’s most-visited museum babaen kadagiti uppat nga agtatakaw nga adda ti iggemda a power tools tapno maala dagiti alahas.
Simmangpet dagiti suspek nga addaan ti vehicle-mounted mechanical lift tapno makastrek iti Gallery of Apollo nga asideg iti River Seine.
Nakastrek ti dua kadagiti agtatakaw babaen iti tawa usar dagiti power tools ken pinangtaanda dagiti security guard nga agbanbantay rason a naitarayda ti dua a display cases a naglaon kadagiti nababalor nga alahas.
Naammoan a basar iti preliminary report, naduktalan a maysa kadagiti tallo a kuarto iti area ti museum ket awan ti nakaimuntar a Close Circuit Television wenno CCTV camera.
Kabayatanna, inpakaammo dagiti otoridad a nagpaut iti uneg ti uppat a minuto dagiti suspek iti uneg ti museum ken rimmuar dagitoy usar ti dua nga scooters nga agur-uray iti ruar.
