LAOAG CITY – Sinungbatan ni Philippine Coast Guard (PCG) spokesperson Commodore Jay Tarriela ni Davao Rep. Paolo “Pulong” Duterte kalpasan a kwinestionaranna ti pannakaikabil ti US military assets pakairamanan ti Typhon missile system ditoy Pilipinas.
Iti social media post, inbatad ni Tarriela a dagiti rakurak ni Duterte ket mangitunda ti “paranoia” ken biddot a takder mainaig iti defense partnerships ti pagilian a napateg tapno maprotektaran ti soberanya ti Pilipinas.
Inlawlawagna a saan a panagtangsit ti inrakurak ni Armed Forces of the Philippines Chief Gen. Romeo Brawner mainaig iti kabaelan ti Typhon system a dumanon agingga iti China no diket palawag laeng kadagiti kagamitan militar ket saan a panangpangta iti aniaman a pagilian.
Kunana a ti rakurak ni Duterte ket arig panangikalintegan iti China gapu ta kapada daytoy kadagiti tattao a saan mangikankano ti agresyon ti Beijing kontra kadagiti Pilipino a mangngalap ken tropa iti West Philippine Sea (WPS).
Maipalagip a ni Rep. Duterte ket anak ni dati a Presidente Rodrigo Duterte a nangitandudo ti nabarbara a relasion iti China a maysa a pagalagadan a binalbaliwan ni Presidente Ferdinand Marcos Jr.
Naammoan a ti deployment ti US missile systems ken joint patrols iti babaen ti administrasion Marcos ket ad-adda a nakapungtot ti China nga agtultuloy ti panangtagikuana iti sibubukel a dispute waters iti baet ti 2016 arbitral ruling a pimmabor iti Pilipinas.
