LAOAG CITY – Inrakurak ni Assistant Ombudsman Mico Clavano a saan pay a simmungbat ni dati nga Ako-Bicol party-list Rep. Zaldy Co kadagiti alegasion iti maipagarup a pannakairamanna iti maanomalya a P289.5 milyon a flood control project idiay Oriental Mindoro.
Ti dakdakamaten ni Clavano ket ti referral ti Independent Commission for Infrastructure (ICI) iti Ombudsman nga agkidkiddaw kadagiti kaso a graft, malversation ken falsification kontra ken ni Co ken dadduma pay nga opisial ti Department of Public Works and Highways gapu iti maipagarup a koneksionda iti road dike project iti asideg ti Mag-Asawang Tubig River idiay Naujan, Oriental Mindoro.
Inbatad ni Clavano a kabayatan nga adda iti ballasiw-taaw ni Co, mabalin latta nga isubmitirna ti sinapataanna a counter-affidavit iti aniaman nga embahada ti Pilipinas.
Inlawlawagna a saan nga aguray ti Ombudsman iti sungbat ni Co iti nabaybayag ngem iti naikeddeng a panawen.
No mapaay ni Co a mangipasa ti counter-affidavit, kuna ni Clavano a solbaren ti Ombudsman ti reklamo kontra kenkuana nga awan ti depensa ti dati nga agpanpanday linteg.
Naglusulos ni Co iti puestona kas kongresista idi Setiembre kalpasan dagiti naruay nga alegasion a karaman isuna kadagiti problema iti panaglayos.
Agtultuloy nga iliblibakna dagiti alegasion kontra kenkuana ken nagkari a sungbatanna dagitoy iti umiso a forum.
