LAOAG CITY – Inrakurak ni Atty. Ruy Alberto Rondain, abugado ni dati nga Ako Bicol Party-list Rep. Zaldy Co a dumanon iti P4.1 billion ti net worth ni Co idi 2019, tawen idi naelektaran isuna iti House of Representatives.
Inbatad ni Rondain, naurnong ni Co ti baknang sakbay pay a simrek iti Kongreso.
Inlawlawagna nga iti baet a saan nga inpakita ti 2019 Statement of Assets, Liabilities, and Net Worth wenno SALN-na, inpettengna a nakasagana a mangipaay ti kopya daytoy.
Kunana nga iti agdama nga Statement of Assets, Liabilities, and Net Worth ni Co, mapattapatta a ngimmato laeng daytoy ti P900 million isu a dimmanon iti P5 billion ti pakabuklan a baknang ti dati a kongresista.
Maipalagip a sumangsango iti imbestigasion ni Co kalpasan a nairaman isuna iti P289.5 million flood control project idiay Naujan, Oriental Mindoro a mapapati nga adda ti pakainaiganna kadagiti “ghost projects” ken kickback schemes, basar kadagiti rakurak dagiti dati a Department of Public Works and Highways engineer nga isuda Henry Alcantara, Brice Ericson Hernandez ken Jaypee Mendoza.
