LAOAG CITY – Adda ti pakabuklan a 1,951,546 a tattao wenno 544,081 a pamilya ti naapektaran ti bagyo Tino.
Daytoy ket basar iti National Disaster Risk Reduction and Management Council (NDRRMC).
Segun iti National Disaster Risk Reduction and Management Council, dagiti apektado a rehiyon ket iti Calabarzon, Mimaropa, Bicol, Western Visayas, Negros Island Region, Central Visayas, Eastern Visayas, ken Caraga.
Kaadoan kadagiti apektado nga indibidual ket manipod iti
Western Visayas nga addaan ti 643,101 wenno 198,550 a pamilya.
Inpakaammo ti National Disaster Risk Reduction and Management Council nga adda met ti pakabuklan a 445,744 nga indibidual wenno 127,827 a pamilya ti nagtalinaed kadagiti evacuation centers idinto a 116,293 nga indibidual wenno 36,752 a pamilya ti napan nagnaed iti sabali a lugar.
Immunan nga inrakurak ti Office of the Civil Defense nga adda ti 140 a pimmusay nga indibidual idinto 127 a sabsabali dagiti mapukpukaw iti iduduprak ti bagyo Tino.
