LAOAG CITY – Inaprubaranen ti konseho iti ili ti Vintar ti pakabuklan a P399,911,463.98 milyon a pisos a budget ti nasao nga ili para iti 2026.
Daytoy ti naragsak nga inpakaammo ni Vice Mayor Maribel Albano iti ili ti Vintar.
Segun ken ni Albano, ngimmato ti P52, 870,932.80 ti budget da para iti 2026 manipod iti budget iti nasao nga ili ita a tawen nga agarop 347-milyon a pisos.
Inlawlawag na a ti kangrunaan a pinondoan da ket iti benneg ti agrikultura, salun-at, dagiti programa ti Department of Social Welfare and Development, ken ti edukasyon.
Nagyaman ti bise mayor gapu ta awan ti nagbalin a problema iti budget deliberation isut gapuna nga alisto ken nasapa a naaprubaran ti budget ti ili ti Vintar para iti sumaruno a tawen.
Innayon na nga awan dagiti opisina a nakissayan ti budget na no di ket adda da pay dagiti nanayunan.
