LAOAG CITY – Kinumpirmaran ni Police Captain Randy Damo, ti chief of police ti Philippine National Police iti ili ti Solsona a ti nakita a bangkay iti kabanbantayan a paset ti Brgy. Maananteng ket ti mapukpukaw a taga Barangay Hilario iti ili ti Banna.
Ummuna iti daytoy, adda ti nakita dagiti dua nga indibidual a residente iti Brgy. Maananteng nga agruprupsan a bangkay iti nasao a kabanbantayan.
Segun kenni Damo, kalpasan a nakita ken naala da ti bangkay ket nakikoordinar kadakuada ti pamilya ti biktima ken positibo a binigbig da daytoy.
Ti biktima ket agtawen ti 64, residente iti Barangay Hilario iti ili ti Banna ngem agdama nga agnanaed iti Brgy. Tabunay, Sarrat.
Inlawlawag ni Damo a basar iti palawag ti pamilya ti biktima, nagpukaw pay laeng daytoy idi Setyembre 18 ken adda ti gundaway a pumanaw iti ili ti Sarrat ken agawid iti Banna.
Inbatad na a posible a naiyaw-awan ti lakay nangruna ket rumrumuar nga agkabaw, agingga a nagpukaw ken maipagarop a naregreg agingga a nakita iti Nabnuangan river.
Naamoan a ti biktima ket namindua payen a nagpukaw kangrunaan na idi Pebrero ken Marso ita a tawen ngem nabirukan da met laeng iti dayta a gundaway.
Kabayatanna, kuna ni Damo nga awan ti foul play iti nasao a pasamak.
