LAOAG CITY – Naka-red alert status ti sibibukel a Northern Luzon Command kas panagsagana iti posible ng epekto ti Bagyo Uwan.
Segun kenni Maj. Al Anthony Puebla, Chief ti Public Information Office – Northern Luzon Command ti Armed Forces of the Philippines, naka-deploy metten dagiti amin a search, rescue and retrieval teams iti nagduduma a lugar.
Inpakammo na nga umabot iti 350 a grupo a bukbuklen ti agarop 3,500 a personnel ti Northern Luzon Command iti paset ti Central ken Northern Luzon.
Karaman ditoy ti pwersa manipud iti Joint Task Force Kaugnay iti Region 3, Joint Task Force Tala a nakabase iti Region 1, Region 2 ken Cordillera Region, Northern Luzon Naval Command, ken ti Tactical Operations in Northern Luzon.
Malaksid iti daytoy, inbatad na a naka-standby dagiti assets da pakairamanan iti land, sea and air assets kadagiti nagduduma a lugar.
Inpetteng na a naiget ti koordinasyon da kadagiti amin a lokal a gobierno ken nagduduma nga ahensya kangrunaan na iti Local Disaster Risk Reduction and Management Offices iti Luzon para iti dagus a panagresponde ken panangipaay da ti tulong.
Inlawlawag na naiget ti panagmonitor da met kadagiti posible nga apektaran ti Bagyo Uwan.
Inpasigurado met ni Puebla nga skilled wenno trained personnel iti Water Search and Rescue training isut gapo na a mangnamnama a saan met a mairisgo dagiti kakadua da.
Kabayatanna, nagpalagip ni Puebla nga agbalin nga alerto ken immapela iti kooperasyon ti publiko kadagiti otoridad iti aniaman nga abiso tapno maliklikan ti madi a pasamak.
