LAOAG CITY – Binisita ni ICI Special Adviser Rodolfo Azurin Jr. kadua na ni Baguio City Mayor Benjamin Magalong ken DPWH Undersecretary Arthur Bisnar dagiti sumagmamano a proyekto iti ili ti Nueva Era.
Ummuna a nagturong ti grupo ti ICI para iti inspeksyon da iti Bongo Bridge kasta met iti proyekto iti Barangay Carray iti ili ti Nueva Era.
Segun kenni Azurin, amin a nasursur da a proyekto iti nasao nga ili ket aramid ti Discaya.
Kabayatan ti panaginspeksyon da ket nakita da nga adda dagiti natarimaan a basar kadagiti inhinyero ket paset iti warranty ti contractor.
Inlawlawag na a ti maysa kadagiti binisita da ket adda ti paset na ti narebba.
Inbatad na nga adda dagiti agbati nga engineers a kadua da pakairamanan ti Philippine National Police ken Armed Forces of the Philippines a mangkita iti plano kas iti lokasyon, ti specification, presyo ken dadduma pay.
Mainaig iti daytoy, kuna ni Azurin nga isaruno da a bisitaen dagiti sumagmamano a proyekto iti ili ti Vintar ken ditoy ciudad ti Laoag.
Kunana a saan laeng a dagiti flood control projects ti imbestigaren da ditoy probinsya no diket dagiti pay dadduma a proyekto kas iti street/solar lights.
Innayon na nga adda ti agarop 150 a proyekto nga agbalor ti siyam a bilyon a pisos manipud 2016 agingga iti 2025.
Kabayatanna, inbatad met ni Bisnar a kadagiti napanan da ket awan ti nakita da a ghost projects ngem saan laeng a ghost projects ti kitaen wenno imbestigaren ti ICI no diket uray dagiti substandard ken amin nga infrastructure projects.
