LAOAG CITY – Nagballigi dagiti otoridad a nangarestar iti maysa a lalaki iti naiwayat nga Anti-Illegal Drug Buy-Bust Operation iti Barangay 4, Poblacion iti ili ti Pasuquin.
Ti suspek ket agtawen ti 29, baro, awanan ti trabaho ken residente iti Brgy. San Juan iti nasao nga ili.
Kinemmeg a dagus dagiti otoridad ti suspek kalpasan a naglako ti maysa a sachet a naglaon ti maipagarop a shabu nga agbalor ti sangaribo a pisos.
Iti panangkapkap dagiti otoridad iti suspek ket nakakumpiskar da pay ti maysa a cal. 45 colt MK IV nga addaan ti magazine nga adda ti karga na nga 6 a balan; maysa a mentos a nakaipalaunan ti 6 nga heat sealed transparent plastic sachet a naglaon ti maatap a shabu, sangaribo a pisos a nausar iti operasyon, navy blue nga sling bag a nakaikargaan ti holster ken ti 150 a pisos a personal a kwarta na.
Basar ken ni Police Major Sheryl Guzman, ti chief of police iti ili ti Pasuquin, ti suspek ket maibilang kas Street Level Individual.
Innayon na a ti suspek ket addaan ti dati a kaso a Frustrated murder ken Slight Physical Injuries and maltreatment.
Iti agdama, nagtalinaed ti suspek iti Philippine National police iti ili ti Pasuquin ken manamnama a sumango iti kaso a panaglabsing ti Republic Act 9165 wenno Comprehensve Dangerous Drugs Act of 2002 ken ti Republic Act 10591 wenno Comprehensive Firearms and Ammunition Regulation Act.
