LAOAG CITY – Inpakaammo ni Senador Imee Marcos nga adda ti 25 a clusters ditoy Ilocos Norte ti awan pay ti kurientena.
Segun kenkuana, adda ti naiget a pammilinna iti Ilocos Norte Electric Cooperative wenno INEC a masapul nga agbalin a 100 a porsiento nga adda ti kuriente dagiti amin a pagtaengan ditoy probinsia.
Nupay kasta, inlawlawagna a kasapulan ti 85 a milyon a pisos a pundo para iti naan-anay a pannakaipursige daytoy a kalikagumda.
Inpasingkedna nga agbiruk daytoy ti pundo tapno maipatungpal ti proyekto ti kooperatiba iti kabiitan a panawen.
Inbatadna nga apaman a maipatungpal daytoy ket adda ti 1.4 kilometers secondary line extension tapno maikonektar ti Lapaz-Monte, Paoay, Saud, Badoc ken Matarang, Vintar.
Mainaig iti daytoy, dinayaw ni Senador Imee Marcos dagiti amin a linemen ken electrical engineers ti Ilocos Norte Electric Cooperative a maipatpatulod kadagiti dadduma a lugar kas iti Bolinao, Pangasinan ken Southern Leyte tapno tumulong iti panangisubli ti suplay ti kuriente kadagiti nadakamat a lugar.
Innayonna a ti Ilocos Norte Electric Cooperative ti kaunaan a kooperatiba iti renewable energy nga addaan ti 1 megawatts solar farm.
