LAOAG CITY – Ginutigot ni House Speaker Faustino “Bojie” Dy III ni dati nga Ako Bicol Party-list representative Zaldy Co nga agawid ditoy pagilyan ken sumango iti imbestigasyon mainaig iti kurapsyon iti flood control projects.
Daytoy ket kalpasan ti panangiparuk-at ni Co ti video a mangak-akusar kenni President Ferdinand “Bongbong” Marcos Jr. kasta met kenni dati nga Speaker ken Leyte Representative Martin Romualdez a nagibulsa iti pondo ti gobierno nga agpada a naglikudan da daytoy.
Segun kenni Dy, saan a makaanay ti video manipud iti sabali a pagilyan gapo ta no nadagsen ti alegasyon ket masapol a mapaneknekan ken nasken a sumango, agsapata ken mangiparang kadagiti ebidensya kadagiti otoridad kas iti Independent Commission for Infrastructure.
Inbatad ni Dy a nakasagana a makikoordenar kadagiti maseknan nga ahensya ti gobierno no kasapulan ni Co ti seguridad kabayatan ti panangipay na ti testimonya na.
Kunana a kabayatan a dagiti dadduma nga agpanpanday linteg ket sumangsango, lumikliklik met ni Co nga isu ti mangtikaw iti publiko.
