LAOAG CITY – Awan ti nadanon a tao iti condominium unit ni dati a Congressman Zaldy Co iti Bonifacio Global City (BGC), Taguig idi inserbi ti kapulisan ti warrant of arrest kontra iti dati nga agpanpanday linteg ita nga aldaw ti Sabado, Nobiembre 22.
Nagturong dagiti kameng ti Southern Police District ken Taguig Police Station ti nasao a condo ti dati nga agpanpanday linteg tapno iserbi ti warrant ngem basar kadagiti caretakers ket addan ti maysa a bulan a nakaserran ti nasao nga unit.
Maipalagip a nangiyisyu ti warrant of arrest iti dati nga agpanpanday linteg ken dadduma pay a maipagarup a nakaawat ti dakkel a gatad ti kickbacks manipud iti flood control projects.
Nupay kasta, immunan a naglikudan ni Co dagiti alegasion kontra kenkuana.
Immuna iti daytoy, inrakurak ni Interior and Local Government Secretary Jonvic Remulla a turongen dagiti address dagiti pagtaengan ni Co para iti pannakaiserbi ti arrest warrant ken no bilang adda iti sabali a pagilian pay laeng ti dati nga agpanpanday linteg, kiddawenda iti International Criminal Police Organization (Interpol) a mangiyisyu ti notice para iti pannakaarestar ni Co ken kiddawenda iti Department of Foreign Affairs (DFA) a kanselaren ti pasaportena.
