LAOAG CITY – Nangiruar ti naiget a pammabalaw ni Presidential Son ken House Majority Leader Sandro Marcos kontra ken ni dati a Congressman Elizaldy Co a nangibutaktak a maipagarup nga addaan met ti budget insertions nga agarup ₱51 billion manipud idi 2023 agingga ita a 2025.
Inpetteng ni Rep. Marcos, ni Co ket maysa a kriminal a manglikliklik iti hustisia ken maibilang a newly crowned champion ti DDS a mangiwarwaras ti kinaulbod.
Inallukoy ni Marcos ti publiko a saan a mamati ken ni Co gapu ta awanan daytoy ti kredibilidad ken kaipapanan kadagiti iruruarna a video nga i-destabilize wenno pabagsaken ti gobierno.
Inbatad ni Marcos, insulto iti sirib dagiti umili ti dakdakamaten ni Co nga awan ti naalana a kickback manipud iti binilyon a pisos a nailatang para iti flood control projects.
Nalawag para ken ni Cong. Marcos nga agar-aramid laeng ti tension iti pulitika ni Co gapu iti kalikagumna a makalibas ti legal a panangsungbatna ken ti namnamana a mawaswas dagiti inaramidna a krimen.
Mamati ni Marcos a nakipagtulagen ni Co kadagiti mabenepisiaran no bilang masukatan ti administrasion.
Nagpalagip pay ni Rep. Sandro, naikkat ni Co kas chairman ti Appropriations Committee gapu iti nakaro a kinaagumna ken korapsion.
