LAOAG CITY – Mangisayangkat ti Ilocos Norte Anti-Corruption Movement ti pressconference inton bigat iti oras ti 11:30 ti bigat agingga iti 12:30 ti malem iti Conference Hall iti United Church of the Philippines.
Segun ken ni Fr. Arvin Mangrubang, Regional Governor of National Priest Organization of Iglesia Filipina Independiente ken miembro ti Ilocos Norte Anti-Corruption Movement, agtitipon dagiti estudiante, mangmangged, religious organizations ken dadduma pay a grupo tapno ipanawagan ti naiget a panangkontrada kadagiti mapaspasamak nga anomalya ditoy pagilian.
Inbatadna a mamatida a ti pundo ti gobierno ket nasken nga agserbi kadagiti umili a saan ketdi a para kadagiti pork barrel projects, patronage politics wenno militarization.
Inlawlawagna a daytoyen ti panawen a rumbeng a maipasardeng ti panagkunniber ditoy pagilian gapu ta maumadan ti kastoy a sistema a maipatpatungpal iti gobierno.
Kabayatanna, inpakaammo ni Fr. Mangrubang nga adda ti walo a kangrunaan a kalikagumda nga ipanawagan iti gobierno, pagsungbaten ken ibalud dagiti adda iti likudan kadagiti maanomalya a flood control projects manipud iti Duterte administration agingga iti Marcos administration, isubli ti tinakaw a kuarta dagiti tattao, ibutaktak dagiti Statement of Assets, Liabilities, and Net worth wenno SALN dagiti amin nga opisial ti gobierno, ibasura dagiti pork barrel ken dagiti confidential funds, pawilan dagiti corrupt contractors a makaawat manen kadagiti proyekto ti gobierno, itandudo ti transparent a budget, lippasen ti political dynasty ken mangbukel ti transition council.
Maipalagip nga inrakurak ti Philippine National Police a mangi-deploy daytoy ti 16 a ribu a pulis tapno siguradoen dagiti demonstrasion ken manamnama ti 300 a ribu ti agatendar kadagiti rally iti intero a Metro Manila.
Immuna iti daytoy, ti maikadua a Trillion Peso March inton bigat, Nobiembre 30 ket kas panangipakita ti naiget a panangkontra iti maipagarup a maanomalya a flood control projects a nangitunda ti nakaro a panaglayos kadagiti sumagmamano a paset ti pagilian.
