LAOAG CITY – Mapagat-atapan nga aglemlemmeng idiay Portugal ti wanted a ni dati nga Ako-Bicol Rep. Zaldy Co.
Iti Malacañang press briefing, inrakurak ni Department of the Interior and Local Government (DILG) Sec. Jonvic Remulla nga adda ti impormasionda a mangipakpakita a posible nga agus-usar ni Co ti Portuguese passport isut gapuna a nakaruar daytoy uray nakanselar ti Philippine passport-na.
Awan ti extradition treaty ti Pilipinas ken Portugal isut gapuna nga ad-adda nga agbalin a narigat ti panagawidna nga agsubli ditoy pagilian.
Nagpanawagan ni Remulla kadagiti Pilipino iti Europa nga ipakita ti ladawan, video wenno aniaman a pammaneknek no bilang makitada ni Co tapno insigida a masarakan ken maarestar.
Kabayatanna, nakumpirmaran nga adda ditoy Pilipinas pay laeng ni Porac, Pampanga Mayor Jaime Capil a wanted met gapu iti kaso a graft mainaig iti ilegal a Philippine Offshore Gaming Operators (POGO) hub a Lucky South 99.
Inbatad ni Remulla, addan ti senyales a sumuko ni Capil kalpasan a nangipatulod ti mensahe a mangipaspasimudaag ti posible a panangsuko kadagiti otoridad ita a lawas.
