LAOAG CITY – Inaprubaranen ti konseho ditoy ciudad ti Laoag ti budget ti gobierno lokal ditoy ciudad para iti 2026.
Immuna iti daytoy, indasar ni Konsehal Donald Nicolas, ti Chairman ti Committee on Appropriations ti draft city appropriation ordinance No. 13 SP-2025-044 a nakaipalaonan ti annual budget ti gobierno lokal ditoy ciudad para iti 2026 nga agbalor ti P1,599, 005, 767.57
Naipasa daytoy kalpasan a nagbotos ti 11 a kameng ti konseho pabor iti daytoy ken awan ti nangkontra ken nag-abstain.
Kabayatanna, maragsakan ni Vice Mayor Rey Carlos Fariñas iti pannakaipasan ti annual budget ditoy ciudad ti Laoag para iti sumaruno a tawen.
Kunana a namnamaen na ti panangaprobar ken suporta ni Mayor James Bryan Alcid apaman a maipama kenkuana daytoy.
Inbatad na pay a ti naaprobaran a pondo ket mangipakita ti kinapateg ken panakaitultuloy ti nagduduma a programa ken serbisyo ti City Government, ken mangipaay t namnama ti pagimbagan ken progreso nga agpaay kadagiti amin a residente ditoy ciudad.
Maipalagip nga immunan nga inbatad ni Mayor Alcid a ti kangrunaan nga inyalokaran da ti pondo ket dagiti social services kas ti agas ken financial assistance, tapno maiparikna ti ad-ado a tulong kadagiti residente ditoy ciudad.
