LAOAG CITY – Inpaiman ni Presidente Ferdinand Marcos Jr. ken ni House Majority Leader ken Ilocos Norte Rep. Sandro Marcos ti panangsungbat iti isyu ti maipagarup a dadakkel a pundo nga inlatang ti Department of Public Works and Highways (DPWH) iti distritona ditoy Ilocos Norte manipud idi 2023 agingga iti 2025.
Inbatad ni Palace Press Officer Claire Castro, nabasa mismo ti Presidente ti report ti Philippine Center for Investigative Journalism (PCIJ) a mangibagbaga a karaman ti distrito ni Cong. Sandro kadagiti kadakkelan a nakaawat ti allocable funds ti Department of Public Works and Highways.
Inlawlawagna a nakasagana ti Presidential Son nga agatendar iti panagdengngeg ti Independent Commission for Infrastructure (ICI) ita a lawas no sadinno a mapaayaban isuna tapno sungbatan dagiti alegasion.
Kunana a silulukatda iti aniaman a lifestyle check, saan laeng ken ni Sandro no diket iti sibubukel a First Family iti baet kadagiti maiyak-akusar a korapsion.
Innayonna a nakasagana a sangoen ti First Family dagiti isyu ken awan ti ilimlimedda.
