LAOAG CITY – Nakalukat ti Malacañang iti posibilidad a mangipaay ti gungguna para iti asinoman a makaitudo wenno makaipaay ti impormasion no ayanno ni dati a Congressman Zaldy Co.
Inbatad ni Palace Press Officer Claire Castro, iti baet nga awan pay ti napagsasaritaan mainaig iti reward system, mabalin daytoy nga ikonsiderar ti Palasyo tapno mapaalisto ti pannakaarestar ni Co.
Kunana a napateg a mabirukan ni Co gapu ta isuna ti agibutbutaktak kadagiti ebidensia kadagiti anomalya iti flood control projects.
Kabayatanna, inpasigurado ni Castro nga agtultuloy ti pannakikoordinar ti Department of Foreign Affairs kadagiti Portuguese authorities.
Daytoy ket kagiddan ti report ti Department of the Interior and Local Government a posible nga adda idiay Portugal ni Co ngem saan daytoy a kaskarina a mapaawid gapu ta awan ti maipatpatungpal nga extradition treaty ti dua a pagilian.
