LAOAG CITY – Balligi ti naiwayat nga Skills Training Program para kadagiti 30 a biktima ken survivors ti Violence against women (VAW) iti Barangay 27 ditoy ciudad ti Laoag.
Daytoy ti inpakaammo ni Ms. Mary Joan Pasigui, ti Focal Person Against Trafficking and Violence Against Women and their Children ditoy ciudad.
Kuna na a ti programa ket kas paset paylaeng ti 18-Day Campaign to End Violence Against Women (VAW).
Inbatad na a naisuro kadakuada ti Malunggay Base Pastry ken Food Processing babaen ti bangus.
Mainaig iti daytoy, kunana a dakkel a tulong daytoy kadagiti babbai a nayon a pagsapulan da para iti pamilia da.
Ti nasao nga aktibidad ket nagbibinnuligan nga inyuswat ti gobierno lokal ditoy siudad babaen ti City Social Welfare and Development Office, Technical and Education Skills Development Authority ken ti Zonta Club Laoag.
Kabayatanna, kuna ni Pasigui a masapol ti naan-anay a pannarabay ken suporta kadagiti biktima ken survivors ti Violence Against Women para iti ibabangon da.
