LAOAG CITY – Nanayonan pay dagiti personalidad nga im-imbestigaran ti Department of Justice (DOJ) mainaig iti maanomalya a flood control projects idiay Bulacan.
Iti agtultuloy a preliminary investigation iti dua kadagiti lima a kaso nga insubli ti Office of the Ombudsman, inbatad ni Prosecutor General Richard Anthony Fadullon a nainayon kadagiti respondents ni dati a Senador Bong Revilla.
Ni Revilla ti maibagbaga a proponent iti proyekto basar kadagiti nakalap a dokumento nga insubmitir ti National Bureau of Investigation (NBI) iti Department of Justice.
Kabayatanna, kinumpirmaran ti Justice Department nga adda pay dagiti sumaruno pay a kaso a sumangpet kadakuada mainaig pay laeng ti flood control projects.
Malaksid ken ni Revilla, karaman pay ditoy ni dati nga Ako Bicol Party-list Rep. Zaldy Co a kuna ni Fadullon ket nagserbi met a proponent ti maim-imbestigaran a proyekto.
Posible a mairuar kadagiti sumaruno a lawas ti subpoena dagitoy no bilang a makumpleton dagiti dokumento a kasapulan manipud iti National Bureau of Investigation.
