LAOAG CITY – Naibakwit ti agarup 90 a ribu a residente idiay Japan kalpasan ti 7.5 magnitude a gingined.
Basar iti Japan Meteorological Agency, binantayanda ti posibilidad nga adda ti mapasamak a tsunami nga adda ti kangato a tallo a metro wenno 10 a kadapan iti northeastern a kabaybayan ti Japan.
Naiparuk-at ti tsunami warning para iti prefectures ti Hokkaido, Aomori ken Iwate ken tsunami manipud iti 20 agingga iti 70 a sentimetro wenno pito agingga iti 27 a pulgada ti kangato ti naobserbaran kadagiti sumagmamano a pantalan.
Nagsentro ti gingined iti 80 a kilometro iti asideg ti kabaybayan ti Aomori prefecture nga adda ti kauneg a 54 a kilometro.
Mainaig iti daytoy, inbatad ti maysa kadagiti empleado ti hotel iti Hachinohe nga adda dagiti sumagmamano nga indibidual ti nasugatan a naitaray iti ospital ngem addan iti nasayaat a kasasaad.
Nasuspenso dagiti sumagmamano a serbisio ti East Japan Railway a naapektaran met idi ti 9.0 a magnitude a gingined idi Marso 2011.
Nangiparuk-at ti pakaammo ti Japan Meteorological Agency iti paset ti Hokkaido, Chiba ken daya ti Tokyo nga agbalin a naridam gapu iti posible a napigsa a gingined a mapasaran ita a lawas.
Kabayatanna, basar iti Tohoku Electric Power a nagpukaw ti serbisio ti kuriente kadagiti rinibu a pagtaengan ngem in-inot met laeng daytoy a nagsubli.
