LAOAG CITY – Inbatad ni Fire Supt. Roxanne Parado, ti Provincial Fire Marshal ti Bureau of Fire Protection (BFP) nga umaboten iti 35 nga indibidual ti nagaplikar para iti permit para iti panaglako da iti paputok ditoy probinsya.
Segun kenni Parado, dagiti nagaplikar ket dagiti datin a nangala ti permit para iti panaglako da iti napalabas a tawen.
Kunana a namnamaen da pay a manayunan ti bilang dagiti agaplikar ita a lawas wenno iti sumarsaruno pay a lawas.
Inbatad na a dagiti natiliwan iti napalpalabas a naglako kadagiti maiparit a paputok ket saan met pay a naggandat nga agaplikar para iti permit da.
Maipalagip a nangrugi idi Disyembre 1 ita a tawen ket addan ti panagsursur ti BFP tapno palagipan ti umili ken panangkita kadagiti designated area, kasta met ti pannakikoordenar da kadagiti barangay kas paset iti kampanya nga Oplan Paalala: Iwas Paputok.
Mainaig iti daytoy, kuna ni Parado a maysa pay kadagiti naiget a bantayan da ket ti us-usaren dagiti ubbing a boga nangruna ket daytoy ti kangrunaan a rason ti pannakasugat dagiti tattao iti napalabas a tawen.
Kabayatanna, inpalagip ni Parado iti publiko a saan nga agusar kadagiti maiparit a paputok kas iti piccolo, plapla, watusi, pop pop, five star, giant bawang, boga ken dadduma pay.
