LAOAG CITY – Plano ti Commission on Elections (Comelec) a mangisayangkat ti maysa pay a technology fair iti umuna a paset inton sumaruno a tawen tapno maammoan ti baro nga automated election systems (AES) nga available iti merkado.
Inbatad ni Commission on Elections Spokesperson John Rex Laudiangco, ti pannakaisayangkat ti nasao nga aktibidad ket mangipaay kadakuada ti ideya kadagiti baro a teknolohia para iti pannakaisayangkat kadagiti eleksion.
Kuna ti pannakangiwat ti Commission on Elections a kitaenda dagiti sumagmamano a components iti baro a sistema ti eleksion pakairamanan ti alisto nga usaren, mangipaay ti husto a resulta ken dadduma pay.
Iti napalabas nga eleksion idi Mayo 2025, nagusar ti Commission on Elections ti automated counting machines (ACMs) nga inpaay ti Miru Systems, maysa a kompania a nakabase idiay Korea.
Kabayatanna, idi 2019 idi naudi a nangisayangkat ti Commission on Elections kaduana ti Department of Information Communication Technology (DICT) ken Comelec Advisory Council (CAC) ti AES Technology Fair, no sadinno a nakipaset dagiti sumagmamano a mangipapaay ti teknolohia.
