LAOAG CITY – Naipaayan ti naruay nga abono ti sumurok dua a ribu nga agmulmula ti pagay ditoy siudad ti Laoag sakbay iti panagngudo ti tawen 2025.
Daytoy ket dakkel a tulong iti panagpatanorda kadagiti mulada a pagay.
Naammoan a dagiti abono ket naggapu iti Department of Agriculture babaen ti National Rice Program nga inkalikaguman ti lokal a gobierno ken City Agriculture Office.
Kaaduan itan nga imulmula a pagay dagiti mannalon iti siudad ket hybrid tapno ad-adu ti maapit.
Malaksid ti abono, addan dagiti immun-unan nga inpaay ti lokal a gobierno kadagiti mannalon kas ti farm machineries, bin-i, hose ken nagdumaduma pay a kasapulan dagiti mannalon.
