LAOAG CITY – Nangisayangkat ti emergency meeting dagiti European ambassadors kalpasan ti panagpangta ni US President Donald Trump a mangipataw ti nangatngato a taripa kadagiti pagilian a mangkontra iti kalikagom na a matagikua ti Greenland.
Immunan nga inpetteng ni Trump a plano na nga ipangato ti import taxes dagiti produkto manipod iti Denmark, Norway, Sweden, France, Germany, United Kingdom, The Netherlands ken ti Finland.
Ti 10% tariff ket maiyaplikar mangrugi intono Pebrero 1 ken manamnama a maipangato pay iti 25%.
Inpetteng ni United Kingdom Prime Minister Keir Starmer a ti pangta ni Trump ket naan-anay a saan a maiparbeng idinto a kuna met ni French President Emmanuel Macron a saan a nakaaawar daytoy.
Maipalagip nga inpaganetget ni Trump a masapol a matagikua ti Estados Unidos ti Greenland para iti US security ken saanna nga iwalin ti panangusar na ti pwersa.
