LAOAG CITY – Kinondenar ni Senador Erwin Tulfo ti panagusar ti nagduduma a grid coordinates ti Department of Public Works and Highways (DPWH) kadagiti flood control project ken nagpanawagan iti maymaysa a sistema ti panagplano ken panagmonitor tapno maliklikan ti pannakaulaw ken possible a korapsyon.
Inaramid daytoy ni Tulfo kalpasan a naibutaktak iti panagdengngeg a saan ng agtutugma ti datos manipod iti Multi-Year Programming and Scheduling System (MYPS) ken Project and Contract Management Application (PCMA), a nausar iti panangestablisar kadagiti maipagarop a ghost flood control projects kadagiti naglabas a tawen.
Basar iti senador, gapu iti nagduduma a coordinates iti dua a sistema ket agbalbalin a “grey area” a mabalin a gundawayan para iti korapsyon.
Inpetteng na a no maymaysa ti us-usaren a coordinates manipod iti panagplano agingga iti aktwal a panagmonitor iti proyekto, al-alisto a maestablisar no adda ti anomaly wenno awan.
Kinanunungan met daytoy ni Department of Public Works and Highways Undersecretary Ricardo Bernabe III ken bigbigbigen na ti panagkasapulan a maurus ti sistema.
Kuna na nga addan dagiti maisaysayangkat a reporma ti ahensya, karaman ti maysa a foreign-assisted project, tapno pagmaymaysaen ti coordinates nga us-usaren kadagiti aplikasyon ti Department of Public Works and Highways.
Innayon na a plano pay ti ahensya ti mangiyuswat ti transparency portal ken agusar ti satellite imaging tapno mapasayaat ti panagmonitor kadagiti proyekto ken makissayan ti human intervention.
Iti isu met laeng a panagdengngeg, ginutigot ni Tulfo ti Department of Public Works and Highways nga iyalisto ti panagberipikar iti listaan dagiti maipagarop a ghost flood control projects iti intero a pagilian gapu ta ti nabayag a proseso ket mangitunda ti panagdudua ti publiko ken mabalin nga agtungpal iti kaawan ti mapagsungbat.
Insungbat met ni Bernabe a dandanin malpas ti beripikasyon ti 421 a proyekto a karaman iti listaan dagiti mapagduduwaan a ghost flood control projects.
