LAOAG CITY – Agtalek ni Presidente Ferdinand “Bongbong” Marcos Jr. nga ibaga ni dati a Public Works and Highways Secretary Manuel Bonoan kinapudno iti manarimaan nga imbestigasyon kadagiti maanomalya a flood control projects.
Iti press briefing, inbatad ni Palace Press Officer Undersecretary Atty. Claire Castro nga agtalek ti Malacañang iti kinapudno ken integridad ni Bonoan kabayatan ti imbestigasyon.
Inaramid daytoy ti Malakanyang kalpasan a nangisyu ti statement ni Senate President Pro Tempore Panfilo “Ping” Lacson a maipagarop a nangiparuk-at ni Bonoan ti saan nga umiso nga impormasyon maipanggep iti flood control projects iti presidente.
Iti met biang ni Bonoan, naglikudan na a nakaawat ti agarop P2 billion a kickbacks manipod kadagiti proyekto ti gobierno.
Maipalagip a kabayatan ti hearing iti Senate Blue Ribbon Committee, dinakamat ni Senador Sherwin Gatchalian ti insumitir nga affidavit ni Department of Public Works and Highways (DPWH) undersecretary Roberto Bernardo, no sadinno nga inakusaran na ni Bonoan a nangbilin kenkuana a mangisumitir ti listaan dagiti proyekto para iti possible a pannakairaman iti 2026 National Expenditure Program, banag a naglikudan met ti dati a sekretaryo ti ahensya.
