LAOAG CITY – Nangiwayat ti inspeksyon ti gobierno lokal iti baro nga slaughter house a masarakan iti Barangay 1 ditoy ciudad ti Laoag.
Segun ken ni Mayor James Bryan Alcid, kadwa na a napan naginspeksiyon iti nasao a pasilidad ket ti City Administrator, City Legal Officer ken City Engineer.
Gagem ti nasao nga addang ket tapno makita ti sitwasion ken no ania pay dagiti masapul a mapasayaat sakbay nga agoperar ti slaughter house.
Inbatad ti mayor a magagaran iti panaglukat ti pasilidad aglalo ket maibilang ti baro nga slaughter house ditoy siudad a maysa kadagiti kabaroan ken kadakkelan iti Region 1.
Maipalagip nga immunan nga inbatad ni Mayor Alcid nga iti kabiitan a panawen ket malukatanen ti slaughter house a dakkel ti maitulong na aglalo iti pannakaisagana dagiti karne ti baboy a mailako iti merkado publiko.
