LAOAG CITY – Naglikudan ti National Bureau of Investigation (NBI) ti impormasion a nakaruaren ti pagilian ti gaming tycoon a ni Charlie “Atong” Ang babaen ti maipagarup a backdoor.
Inbatad ni Acting National Bureau of Investigation Director Lito Magno nga awan pay ti naawatda a report iti ground a rimmuar iti pagilian ti negosiante wenno nagusar ti ilegal nga exit points.
Inlawlawagna a naiget ti iwaywayatda a pannakikoordinar iti Bureau of Immigration tapno mabantayan dagiti amin a posible a pagruaran ti pagilian ti maibilang a Top 1 most wanted ti Pilipinas.
Inpetteng ti National Bureau of Investigation a dakkel ti tsansana a matiliw ni Ang gapu ta naiwaras dagiti tauhanda a mangiwaywayat ti operasion ken panagsukimat kadagiti sumagmaano a sanikua ti negosiante.
Kuna ti ahensia a saanda nga agsardeng agingga a saan a matiliw ni Ang nangruna ket isuna laengen ti nabatbati nga akusado a birbiruken dagiti otoridad iti kaso dagiti mapukpukaw a mammallot.
Kabayatanna, kidkiddawen pay ti National Bureau of Investigation ti pannakailawlawag mainaig iti rakurak ni Department of the Interior and Local Government Secretary Jonvic Remulla a maipagarup a saan nga agkidkiddaw ti tulong iti ahensia gapu ta adda dagiti maipagarup a National Bureau of Investigation agent a maipagarup a dineputize ni Ang kas bodyguard daytoy.
Ni Ang ket sumangsango iti kaso a kidnapping with homicide ken kidnapping and serious illegal detention mainaig iti pannakapukaw dagiti mammallot.
